De geschiedenis van de Pinmaekers

Oorsprong van de vastelaovundj:

De oorsprong van de Vastelaovundj in Ni-jwieërt kintj un lânk verleejje, en d'r zal in Ni-jwieërt zeker al un hieël poeës Vastelaovundj geveertj waere. Alleîn zal de meneer woeërop, en de belaeving hieël ângers zeen gewaestj.Vreuger waas ut un oeting van dankbaarheid. Tegewoordig gieët ut mieër um de veering van ut fieëst zelluf. De tiêd liertj, det de Vastelaovundj veering en de belaeving zich nog altiêd heet verangertj, net zoeëwi-j de Pinmaekers zelf.

De Pinmaekers:

In Ni-jwieërt en umgaeving laag vreuger un hiel groeët hoeëgveen gebied, wao vul mînse van Ni-jwieert eure schraole boterham beejein verdeendje met törfstaeke. Auch haaje völ mînse nog eîn eige törfveldje, wao ze törf stoöke vör eige gebroeëk. Vanaaf de maond-j Mei trokke ze dan de Pieël in, en bleeve dao dan tot de herrufst. As ongerkoôme bouwdje ze dan un plaggehut um te overnachte (plagge zeen de boveste zooj-je oet ut törfgebied). Volges de legende woord eêdere daag unne houtere Pin in unne turf gestoôke, woeënao ze beej ut plaatse van de zevendje Pin heivers ginge, um nao de Kerk te gaon.
Ni-jwieërtenaren draâge daorum de naam "de Pinmaekers", en zoeë auch de vastelaovundj vereiniging!!

De oorlogsjaore:

In de jaore 40-45 kwoom van ut vereinigingslaeve over ut algemein neet zoeevöl terecht. Nao den oorlog woorte d'r völ vereiniginge oppernowtj opgerichtj. Zoee auch Vastelaovundjvereiniging "De Pinmaekers".

Heroprichting:

Nao de heroprichting heet de vastelaovundjvereiniging zoeëwaal deepdje as hoeëgtepunte gekintj. Ut groeëtste deepdje puntj waas in 1972 en 1973. Toen veele zoeëwat alle georganisjeerdje vastelaovundj aktiviteite weg; d'r woor zellufs geine Prins of raod van elluf mieêr!! In de herfst van 1973 vormdje zich de huidige formasie "De Pinmaekers", dij de organisaasie ônger leiding van un now bestuur en veurzitter / Vorst Jaap Kaan, weer op zich noom. De vereiniging grudje oet nao un volwaardige vereiniging, met een hieël rits activiteite vör jonk en aod.De nowwe Pinmaekers woore zellufs sterk genog um unne nowwe bestuurskriesus in 1995 te kunne overlaeve.