Veurwoord vorst Jack

Leef Pinmaekerinnekes en Pinmaekers.

Fein dejjae uch ouch nôw weer de tieëd guntj om oppe saait van de Pinmaekers te kieke.
Dit is un neet mieër weg te dinke item in dees moderne consumpsiemaatschappi-j, en un  höllepmiddel um uch Vastelaovundjveerders op de huuëgdje te hao-je van waat d’r allemaol laeftj en speultj binne de Pinmaekers en wannieër d’r wat te doon es woeë vae haer gaon met ôos vereiniging. Gae kuntj alle evenemente bekieëke en zoeë eur keus maake wao dej-jae haer kintj/wiltj gaon..

Zoeë wi-j dejjae kuntj zeen is de saait van de Pinmaekers us good onger hang genoôme en hoope vae dejjae ut ein stök gemaekelikker kuntj vòllege en overzichteliker vingtj.
As dejjae eventueel suggesties hetj, gaeftj dit door aan ôs sekretariaat.

In prinsipe kujjae teegewoordig 24 oor per daag beschikbaar zeen via twitter, msn, feesboek, sms en neumtj mer op. En as dejjae dao in geluijft, eistj dees modern maatschappi-j dit ouch van uch…mer dao zeen neteurlik grenze en di-j gaefdje tenstlotte zellef aan.
Ut zeen modern höllepmiddele di-jt neet mieër weg te dinke zeen, mer aan de ângere kant motte vae dr met z’n alle vör waake det ut sosjaale, ut minselike heejdoor neet weggevaagdj wurtj.
Ut mot ouch kunne dejjae op eur gemaak erregus kuntj klasseneere zonger gestuuërdj te waere door eure tillefoon of wat dan ouch. Aaf en tôw heb ich ut idee det vae ôs zellef gek laote maake door al dees middele. Neet vör niks det teegewoordig neemus geine tieëd mieër heet. Tenslotte zitte d’r allewiel nog steeds 24 oor in eine daag, net zoeë wi-j vreuger, mer toen moste ze haarder en langer wêrreke en woore di-j modern kommunikasiemiddele d’r neet.

Vae zeen as vereiniging momenteel haard doondje um diverse evenemente op de schöp te neeme.
Zoeë es ut lidjesfestival oppe schöp genoome en hetj ut teegewoordig Ni-jwieërter Vastelaovundjschlager Festival. Ut is eine hieële angere opzet gewoore
Ouch de Vastelaovundj-mêrretj krigtj unne hieële ângere opzet. Ut ennige waat det dur van overgebleêve es, es de veiling woeë dejjae goojekoup taksie/bakkersbonne etc. kuntj koupe.

Beste laezers hopelik laodjae uch regelmaotig oppe huuëgdje haoje door ôzze schoeëne nowwe saait.
Gaotj d’r van geneête ut koomendj Vastelaovundjsezoen en laotj ôs saame op ein of anger evenement onger ut genot van un glaeske beer wieter kalle over alle schoeën dinger van ut laeve.

Restj mich uch nog tôw te winse un geweldjig Vastelaovundjs-sezoên.

ALLEMAOL EIN – ALLEMAOL PIN

Vorst Jack