Ut is inmiddels traditie in de aanloup nao ‘t vastelaovendj seizoen.
Vör de 16e kieër organiseertj Vastelaovendjvereiniging De Pinmaekers oet Ni-jwieërt eine
try-out vör buuttereedners.
Dit jaor zulle mer leefst 8 buuttereedners mei-j doon aan deze try-out.

Now Lokasie
De try-out zal gehojje waere op zaoterdig 12 oktoeëber 2024 um 19.30 oor in ’t
Pinmaekers pelieës op Budschop aan ’t Rochusplein 1 Ni-jwieërt-Budschop.

Acht buuttereedners 
Aan dees editie doon mer leefst 8 buuttereedners mei-j, waovan d’r ein aantal in de veurronde hebbe gestange en zelfs finalist zeen gewore van ‘t Groeët Limburgs buutte kampioenschap.

Koen van Soest oet Ysselsteyn stong in 2023 in de finale en zal met zieëne nowste buut
Tinus Thuusbezurg de bezeukers weer flink laote lache.

Ouch Charlie Wijen oet Wieërt stong in 2023 in de finale van ‘t Groeët Limburgs buutte kampioenschap en wis al ‘ne kieër de finale van ‘t Zuid Nederlandse kampioenschap te bereike.
Charlie zal deze kieër de buut De ieërste kier ten gehuuere bringe.

Bjorn Smits oet ‘d Indj is ouch weer van de parti-j met zieëne nowe buut.
Bjorn stong al verschillendje kieëre in de groeëte finale en woord in 2018 Buuttekampioen.

Naeve Bjorn zal ouch Buuttekampioen 2022 Helga Cornelissen oet Oostrum acte de préséance gaeve met eure buut Conny van de camping.

Luc Janssen oet Ysselsteyn stong in 2022 ouch in de groëte finale en hae zal zieën buut Huusvader Bennie Thuisman met verve bringe.

Jeroen Peeters oet Leunen zal voor de ieërste kieër ‘t podium betrej-je met zieën buut Vinny d’n uutsmieter.

A Mies en Kaal  zal met geweldjige weurdspeulinge de zaal weer aan ‘t lache krieëge en zeen as breurs Op zuuk noar un date vur ozze simpele.

Tot slot zal de zesvoudig buuttekampioen Ger Frenken oet Roggel zieën nowste buut Ode aan Piejeer Cnoops bringe.

Beoordeling
Nao de optrejjes wurtj d’r ein beoordaeling gegaeve in de vorm van tips en tops door
Will Knapen (Wullemke) en Peter Stultiens.

De presentatie is in hang van René Knapen

Ut wurtj zeker weer eine schoeëne aovendj met völ plezeer as veurbereiding op het nowe vastelaovendjseizoen van 2025. 

Aanvang
De zaal gieët ope um 19.00 oor, ’t programma startj um 19.30 oor.
De entree à contant bedraagtj € 6,00. p.p.
Dao is geine veurverkoup.