Oorsprong van de Vastelaovendj n Ni-jwieërt

De oorsprong van de Vastelaovendj in Ni-jwieërt kintj ’n lank verleje.
Allein de meneer wao op en de belaeving van Vastelaovendj zeen door de jaore haer verangerdj.
Schoeën veurbieëldje daovan zeen de klei-jing, de muziek, de bonte aovendje, de boorebroeleft, de optocht, mer ouch de vereiniging de Pinmaekers.   

De Pinmaekers
In Ni-jwieërt en umgaeving laag vreuger ’n hieël groeët hoeëgveengebied, wao völ minse van Ni-jwieërt heure schraole boterham bi-jein verdeendje met törfstaeke.
Ouch haaje völ minse nog ‘n eige törfveldje, wao ze törf stoke vör eige gebroeëk.
Zoeë ouch Slumme Pier.
Deze törfstaeker bedacht ’n meneer um tieëdes ’t dagelank verblieëf in de Pieël bi-j de tieëd te blieëve.
Volges de legende stook hae edere daag  ‘ne houte pin in ‘ne törf .
Bi-j zeve pin wist hae det ’t zondig waas en tieëd um nao de kerk te gaon.
Aan Slumme Pier danke de Ni-jwieërtenare dan ouch de bi-jnaam Pinmaekers.
En ’t zal dan ouch nemes verbaze det de vastelaovendjsvereiniging zich daorum
“De Pinmaekers” neumtj.
‘ne Naam dae de tandj des tieëds heet doorstange en wao de Pinmaekers nog altied gruuëts op zeen.

De oorlogsjaore
In de jaore 40-45 kwaam van ‘t vereinigingslaeve over ‘t algemein neet zoeevöl terecht.
Nao den oorlog woorte d’r völ vereiniginge oppernow opgerichtj.
Zoeë ouch vastelaovendjsvereiniging “De Pinmaekers”. 

Heroprichting
Nao de heroprichting heet de vastelaovendjvereiniging zoeëwaal deepdje- as hoeëgtepunte gekindj.
‘t Groeëtste deepdjepuntj waas in 1972 en 1973. Toen vele zoë wat alle georganiseerdje vastelaovendjsactiviteite  wèg.
D’r woor zelfs geine prins of Raod van Elf mieër.
In de herfst van 1973 woort de draod weer opgepaktj en woort d’r door ’n now bestuur ónger lei-jing van veurzitter en vorst Jaap Kaan now laeve geblaoze in de georganiseerdje vastelaovendjsactiviteite.
De vereiniging gruudje oet nao ‘n volwaardige vereiniging met hieël völ aktiviteite vör jonk en aod.